“Mjeshtri dhe Margarita”, romani i trishtueshëm e i frikshëm

“Mjeshtri dhe Margarita” në Bashkimin Sovjetik të periudhës staliniste mundi të shpërndahej në dorëshkrim në mënyrë clandestine, në rrethin e ngushtë të miqve të Bulgakovit. Në format libër u botua vetëm njëzet e gjashtë vjet mbas vdekjes së tij.
Kjo kryevepër konsiderohet si një roman kompleks, i ndërlikuar dhe tronditës. Përshkrimi alegorik deri në detaje i dramës njerëzore e zhvendos lexuesin mes dy botëve paralele. Pasi ka përjetuar emocione tronditëse ai e ka të vështirë që të bëjë dallimin mes gënjeshtrës dhe së vërtetës.
Ky trazim i ndjesive gjatë leximit nuk lë hapësirë për një zgjedhje vetjake, por e dikton lexuesin për t’i shkuar këtij “teatri” deri në faqen e fundit, i shoqëruar me dilema të shumta dhe vështirësi për të bërë zgjedhjen e duhur, mes botës materiale dhe asaj ideale, mes jetës tokësore dhe shpresës për të ardhmen, gëzimit të rilindjes apo hidhërimit mbas një jete të vështirë e pa shpresë.
Intrigë demoniake, perde të shumta tymi.., satirë therëse, kjo është gjuha e Bulgakovit i cili na bën të refektojmë për njerëzit, rrezikun që paraqet ndikueshmëria e manipulatorëve dhe sharlatanëve në një grupim shoqëror të caktuar. Ky libër e çon individin në një marrëdhënie trishtuese e pa perspektivë, e ku i duhet të luftojë për të ringjallur vetveten, përballë një bote të ndërtuar mbi pabesinë dhe dashurinë e humbur.

“Mjeshtri dhe Margarita është një roman mbresëlënës, i trishtueshëm dhe shumë i frikshëm… Është një nga kryeveprat e Letërsisë Botërore”, shkruan Herald Tribune

Mihail Bulgakov Afanasevich, ishte një dramaturg dhe romancier rus, i njohur për përdorimin e humorit dhe satirës. Ka lindur në Kiev, më 15 maj 1891 dhe u diplomua në Fakultetin e Mjekësisë në vitin 1916.
Shërbeu si mjek në front gjatë Luftës së Parë Botërore. Në vitin 1926, vuri në skenë pjesët e para dramaturgjike bazuar në romanin “Garda e Bardhë”.
Veprat e Bulgakovit u bënë shpejt të njohura, por për shkak të satirës ndaj regjimit, ato u censuruan.
“Zemra e qenit” u botua në Bashkimin Sovjetik për herë të pare, vetëm në vitin 1987. Ndërsa romani i fundit, “Mjeshtri dhe Margarita”, u botua për herë të parë në vitin 1966.
Bulgakovi vdiq në Moskë më 10 mars 1940.