Kirurgia e mirënjohur Lida Shosha ka rrëfyer në emisionin “E ardhmja është vajzë” një histori shumë prekëse me një paciente nga Kosova, e cila ishte në rrezik për të vdekur. Mjekja e ka konsideruar këtë moment si më të vështirin dhe më stresuesin që ka kaluar ndonjëherë.
“Po përmend vetëm njërën, një paciente e imja nga Kosova, e cila kishte një formacion të lartë tumoral, ishte 42-vjeçe. Kolegët e Kosovës e kishin hapur, e kishin parë që tumori ishte tmerrësisht i madh dhe e kishin mbyllur sërish, kurse ajo vjen nga Kosova dhe para derës sime thotë dua një konsultë me ju. I bëj konsultën, bëjmë rezonancën dhe del që tumori ishtë shumë i madh dhe rreziku i një hemoragjie në sallën e operacionit ishte prezent.
Një rrezik i tillë, i cili mund t’i merrte dhe jetën. Gjithçka ishte e hapur, pacienti e dinte mirë situatën, familjarët e saj dhe ajo thotë: “Shiko, unë mendoj që nëse është për të vdekur, le të vdes në duart e tua”. Kur pacienti të thotë këtë gjë, mjeku vihet përpara një përgjegjësie të jashtëzakonshme, sepse di vështirësinë e operacionit, por ai shikon edhe ngulmimin e pacientin deri në fund. Kjo bën që mjeku edhe atë stepje që ka ta kalojë, të thotë në rregull, ne do futemi në këtë rrugëtim, i cili mund të jetë më keq se ferri. E futëm pacienten në operacion, ashtu si kundër tumori ishte shumë i madh dhe bëri një hemoragji nga masat e mëdhaja. Di që ekipi i anestezistëve po bënte maksimumin, në një moment doktoreshë Marjeta më thotë: “Tensioni është katër me dy i pacientit”. Domethënë pacientin po e humbim. Unë të betohem që tensioni im vajti zero dhe nuk e di se si në ato momente arrita ta ruaja qetësinë dhe të luftonim bashkë me një ekip të jashtëzakonshëm për ta shpëtuar atë. Shpëtoi dhe pas dy javësh vjen nga Kosova dhe unë akoma dridhesha”,- rrëfeu mjekja.
