Një ngjarje e rëndë është regjistruar në Kosovë, ku një vrasje ka ndodhur paraditen e sotme në Vranjevc. Mësohet se, një nxënës i shkollës “Hilmi Rakovica” është vrarë me thikë në rrugën “Fahri Fazliu”, në Prishtinë.
Viktima është identifikuar si R.H. mashkull 14 vjeç, ndërsa nuk dihet ende identiteti i autorit. Policia po përpiqet të zbardhë ngjarjen pasi ende nuk dihet cili ka qenë shkaku, por raste të tilla të lënë të dyshosh që konflikti ka ndodhur për motive të dobëta dhe më pas ka degraduar në vrasje.
“Sot rreth orës 07:30, kemi pranuar informatën për një rast vrasje, në rrugën “Fahri Fazliu”, në Prishtinë. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore. Bazuar në të dhënat fillestare, personi i cili dyshohet se ka marrë lëndime të rënda nga një mjet i mprehët (thikë) dhe i njëjti është dërguar në Qendrën e mjekësisë Familjare (QMF), ku dhe është konstatuar vdekja e tij. Vdekjen e viktimës R.H. mashkull 14 vjeç, e ka konstatuar ekipi mjekësor në QMF. Aktualisht hetuesit policor kanë nisur një hetim për sqarimin e të gjitha rrethanave që lidhen me rastin”, thuhet në njoftimin e policisë.
