Ministrja e Turizmit dhe Mjedisit Mirela Kumbaro priti në një vizitë zyrtare në Tiranë Ministrin e Mjedisit dhe Energjetikës të Greqisë, Kostandinos Krekas. Të dy ministrat diskutuan për zonat e përbashkëta të mbrojtura dhe folën për sfidat që duhen kaluar për të mbrojtur mjedisin dhe për rrjedhojë turizmin. Problematika në foksu ka qenë përdorimi i lartë i qeseve plastike dhe shpërndaja e tyre në mjedis. Ministrja Kumbaro e njohu homologun grek edhe me nismën e fundit për ndalimin e qeseve plastike njëpërdorimshe.
“Nga 1 qershori i këtij viti ndalojmë qeset plastike njëpërdorimshe, me trashësi 70 mikron në secilën anë. Nismat e mëparshme që bazoheshin në aplikimin e një pagese simbolike për qeset nuk kanë rezultuar të suksesshme, ndaj kemi shkuar drejt këtij hapi që është mirëpritur nga qytetarët”, tha gjatë takimit Kumbaro.
Krekas tha se diçka e tillë do të merret në konsideratë për t’u aplikuar edhe në Greqi, ku po ashtu shpërndarja e qeseve të lehta mbajtëse përbën një problem mjedisor. Ndër të tjera ai shtoi se më së shumti në Shqipëri hedhja e qeseve plastike nëpër mjedis ka krijuar probleme në bregdet e shteteve fqinje, që lagen nga ujërat e të njëjtit det, përfshirë këtu edhe Greqinë.
