Ministrja e Mbrojtjes znj. Mimi Kodheli mbajti një leksion para studentëve të Universitetit Ndërkombëtar të Strugës.Fillimisht ajo u prit në takim nga rektori i Universitetit Ndërkombëtar të Strugës, prof. dr. Bashkim Rama, si dhe stafi pedagogjik i këtij universiteti.
Leksioni i mbajtur nga ministrja Kodheli kishte të bënte kryesisht me përfitimet e anëtarësimit të Shqipërisë në NATO dhe pritshmëritë e Maqedonisë në këtë rrugëtim. Duke folur për rëndësinë e anëtarësimit të Shqipërisë në NATO, ministrja Kodheli theksoi se siguria kombëtare krijoi garancinë më të fuqishme të mundshme.Në fjalën e saj, ministrja Kodheli, tha se me anëtarësimin në Aleancë, Shqipëria u bë partneri i qeverive të vendeve anëtare të NATO-s, me të cilat i duhet të diskutojë perspektivat dhe të ndajë vendimmarrjen. Ndoshta në dallim nga vendet e tjera të rajonit, anëtarësimi kishte rëndësi dhe më të madhe, pasi kjo aleancë, sipas saj, luajti një rol jetik në ndalimin e luftërave në Ballkan dhe posaçërisht, në lirinë dhe pavarësinë e Kosovës.
Duke folur për buxhetin e mbrojtjes, ministrja Kodheli paralajmëroi një shtesë fondesh që i paraprin një projekti të rëndësishëm për sigurinë e vendit. “Do të bëjmë një rialokim fondesh dhe ne do të përfitojmë si Ministri një shumë të konsiderueshme parash që do të na mundësojnë t’i futemi një projekti madhor, shumë të rëndësishëm për ne, për sigurinë e Shqipërisë.”- u shpreh ajo. Ministrja Kodheli iu përgjigj edhe pyetjeve të studentëve lidhur me sulmet terroriste, anëtarësimin e Shqipërisë në NATO si dhe anëtarësimin në BE. Nuk mungoi as interesi në lidhje me ngrijtjen e një Qendre Ekselence në Shqipëri, për të cilën ministrja Kodheli u shpreh se Shqipëria do të vendosë “njollën” e parë të saj në NATO.
Gjatë qëndrimit në Strugë, zonja Kodheli zhvilloi një takim edhe me kryetarin e subjektit politik shqiptar Bashkimi Demokratik për Integrim, z. Ali Ahmeti, me të cilin diskutoi në lidhje me ndihmën e Shqipërisë për anëtarësimin e Maqedonisë në NATO, ku zonja Kodheli tregoi gatishmërinë për të qenë edhe më tutje një zë i fortë në drejtim të vazhdimit të kësaj ndihme.
Gjithashtu në qytetin e Strugës, ministrja Kodheli vendosi buqeta me lule në bustin e kundërshtarit ekstremist të sundimit osman dhe autorit të thirrjeve manifestuese radikale për një luftë mbarëkombëtare kundër Perandorisë Osmane, Dervish Hima si dhe të veprimtarit dhe personalitetit të shquar të Rilindjes Kombëtare Shqiptare, dr. Ibrahim Temo.
