Pas deklaratës së ministres së Financave dhe Energjitikës, Anila Denaj se lajmi për shtimin e një takse të re mbi karburantet ishte një gënjeshtër e opozitës, ka reaguar ish-deputeti demokrat, Agron Shehaj.
Shehaj ka bërë publik dokumentin që sipas tij vërteton të kundërtën e asaj çfarë thotë ministrja. Në një postim në rrjetet sociale Shehaj shkruan se qeveria mashtron qytetarët duke e mohuar këtë taksë të re.
Reagimi i plotë:
Qeveria mashtron qytetarët duke mohuar taksën e re mbi naftën.
Ligji i ri parashikon shprehimisht që burimi financiar i agjencisë mbi menaxhimin e rezervave të naftës do të jetë: “Tarifat e krijimit dhe mbajtjes se rezervës se sigurisë që aplikohen mbi sasitë e produkteve energjetike hidrokarbure që shiten në Republikën e Shqipërisë..”
dhe
“Këshilli i Ministrave, me propozimin e ministrit, vendos tarifat e përmendura në pikën 1.1..”
Rama bën lojra fjalësh. Edhe taksën prej 5 eurosh të Rrugës së Kombit e quajti tarifë por pak rëndësi ka si e quan.
E vërteta është që kemi të bëjmë me taksën e radhës për shërbime të panevojshme, që nuk ka për qëllim rritjen e cilësisë së jetës së qytetarëve por vetëm një mënyrë të re për të pasuruar veten dhe miqtë e tij oligarkë në kurriz të popullit me të varfër në Europë.
