Tahiri: Armët pa leje në trup, sipas nesh duhet të konsiderohen si përgatitje për sulm me armë
Ministria e Brendshme po përgatit draftligjin për armëmbajtjen pa leje, e cila parashikohet të jetë vepër e rëndë penale. Pas vendimit të Gjykatës Kushtetuese, që rrëzoi disa nene të Kodit Penal për këtë vepër penale, Ministri i Brendshëm Saimir Tahiri, bëri publike inisiativën për ndryshimet në ligj. “Ajo që ne do bëjmë me urgjencë është propozimi për kolegun tim, ministrin e Drejtësisë dhe për Kuvendin, propozimi i amendamenteve për të dënuar maksimalisht “armëmbajtjen pa leje”. Do të fokusohemi që të mbledhim praktikat më të mira botërore, duke bërë çmos që “armëmbajtja pa leje” të jetë një vepër shumë e dënueshme.
Një ndër to parashikon ndarjen e armëmbajtjes nga armëmbajtje në trup në armëmbajtje në mjedise, qoftë kjo makinë, qoftë kjo shtëpi. Po shikojmë disa modele që janë mjaft pozitive. Unë kam nxitur edhe ekspertë të Policisë së Shtetit dhe Ministrisë së Punëve të Brendshme të vlerësojmë të gjitha variantet.
Një variant është që armëmbajtja pa leje në trup mos të konsiderohet si armëmbajtje pa leje, por përgatitje për sulm me armë që dënohet shumë më shumë. Ndërkohë armëmbajtja pa leje në makinë apo në shtëpi të konsiderohet nga pikëpamja e Kodit Penal vetëm si armëmbajtje pa leje dhe të dënohet po shumë, por jo aq sa armëmbajtja pa leje në trup, që sipas nesh duhet të konsiderohet si përgatitje për sulm me armë”, tha Tahiri.
