Ministrja e Jashtme, Olta Xhaçka, zhvilloi këtë të premte një konferencë të përbashkët me ministrin e Jashtëm të Maqedonisë së Veriut Bujar Osmani.
Gjatë fjalës së tij Osmani tha se po ndjekin me vëmendje dialogun mes Prishtinës dhe Beogradit, e cila do t’i hapte rrugë sipas tij një Ballkani të sigurt dhe të qëndrueshëm.
Zyrtari i Maqedonisë së Veriut shtoi se së bashku me ministren Xhaçka kanë firmosur marrëveshjen e bashkëpunimit në fushën e diasporës.
“Jemi të interesuar për dialogun Prishtinë – Beograd, e mbikëqyrur nga BE-ja dhe SHBA-ja që do të hapë një hap serioz drejt një Ballkani të qëndrueshëm. Në këtë drejtim pata nderin t’ia prezantoj ministres marrëveshjen trepalëshe që iniciohet nga vendi ynë. Të tre vendet, Maqedonia e Veriut, Shqipëria dhe Bullgaria mund të gjejnë një forum të rëndësishëm. Temë e diskutimit ishte dhe forumi i Prespës për dialog, promovimin e multikulturalizmit në rajon si një sfidë e rëndësishme për Ballkanin. Sot do të nënshkruajmë dhe marrëveshjen për bashkëpunim në fushën e diasporës, në kuadër të bashkëpunimit dypalësh. Ramë dakord se do të intensifikojmë bashkëpunimin mes dy vendeve për ti hapur rrugë investimeve. Degën e kulturës që është në Maqedoninë e Veriut do e hapim në Tiranë”, tha Osmani.
