Ministri i Jashtëm i Gjermanisë, Frank Valter Shtajnmajer vjen sot në një vizitë zyrtare në Tiranë. Shtajnmajer do të qendrojë vetëm 6 orë në kryeqytetin shqiptar dhe sipas burimeve, axhenda e tij parashikon vetëm tre takime.
Sipas Ministrisë së Jashtme të Gjermanisë , kryediplomati gjerman do pritet nga homologu i tij, Ditmir Bushati, rreth orës 10:30 dhe pas takimit, dy ministrat do të dalin edhe në një konferencë për shtyp. Më pas Shtajnmajer do të takohet në selinë e qeverisë me kryeministrin, Edi Rama si edhe më vonë do të niset drejt selisë së PD-së, ku do të zhvillojë një bashkëbisedim me kreun e kësaj partie, Lulzim Basha.
Temë kryesore e takimit pritet të jenë bashkëpunimi bilateral Shqipëri-Gjermani, zhvillimet në rajon por edhe reforma në drejtësi. MPJ gjermane thotë se vizita e Steinmeier është konfirmimi i mbështetjes për Shqipërinë dhe reformat.
Kjo është është hera e parë që Shtajmajer vjen në Tiranë dhe vizita e tij ndodh në një kohë kur politika ende nuk ka gjetur konsensusin për miratimin e reformës në drejtësi. Zyra e kancelares gjermane Angela Merkel u angazhua drejtpërdrejt pak ditë më parë për gjetjen e një konsensusi mes palëve për “drejtësinë” dhe u bë e ditur se lideri i opozitës shqiptare, Basha pati edhe një telefonatë nga Berlini zyrtar pak orë para takimit me kryeministrin Rama.
