Një auditim i Kontrollit të Lartë të Shtetit zbardh se si Ministria e Financave dhe Ekonomisë devijon fondet e investimeve të huaja duke i përdorur për udhëtime, dieta, fjetje apo trajnime. TV Scan disponon raportin e auditimit të KLSH, ku është konstatuar se si fondet për projekte me financim të huaj paraqiten me keqklasifikim në raportimin për efekt buxheti në shumën 106, milion lekë, ku raportohen si investime fonde të ekzekutuara në trajnime dhe konsulenca.
Shpenzimet në projekte për mbështetjen e turizmit, si shpenzime transporti, dieta, fjetje, apo akte ekspertimi, planifikohen dhe raportohen si investime në turizëm, keqklasifikim i konstatuar në shumën 7.9 milion lekë. Raporti thekson se bëhet fjalë për gabim të konstatuar që në fazën e planifikimit e deri në raportim.
Ndërkohë që devijimeve nuk u shpëtojnë as fondet e brendshme. Projektet të parashikuara të realizohen me fondet buxhetore të investimeve kapitale me financim të brendshëm në vitin 2018, janë realizuar me fonde të buxhetit operativ të vitit 2017, devijancë e konstatuar në shumën 13 milion lekë.
/TV Scan/
