“Mini-Schengeni”/ Basha: Dështimi me integrimin europian s’mund të zëvendësohet nga propaganda anti-europiane

Lideri i opozitës, Lulzim Basha ka komentuar Samitin e Ohrit që u mbajt sot në kuadër të projektit “Mini-Schengeni Ballkanik”, ku veç Aleksander Vuçiç dhe Zoran Zaev, merr pjesë edhe kryeministri ynë Edi Rama.

Sipas kryedemokratit, dështimi me integrimin europian nuk mund të zëvendësohet nga propaganda anti-europiane e një autokrati të korruptuar

“Lëvizja e lirë e njerëzve, mallrave, shërbimeve dhe kapitalit është thelbi i integrimit europian dhe Europës së bashkuar. Parakushte për lëvizjen e lirë janë demokracia, sundimi i ligjit dhe garantimi i të drejtave dhe lirive themelore të njeriut.

Dështimi me integrimin europian nuk mund të zëvendësohet nga propaganda anti-europiane e një autokrati të korruptuar, shkaktar i prapambetjes ekonomike dhe varfërimit të qytetarëve shqiptarë. Ka ardhur koha që Shqipëria të nxjerrë në dritë potencialin e saj të vërtetë!”, shkruan Basha.