Pas vdekjes së 20-vjeçarit Eduart Dama në minierën e Bulqizës ka reaguar Konfederata e Sindikatave të Shqipërisë.
Xhungël që po u merr jetën njrëzve, e cilëson sindikata këtë minierë, ndërsa fajëson shtetit që vijon të heshtë.
Reagimi i Konfederatës së Sindikatave të Shqipërisë
Ende pa u tharë njollat e gjakut të 30-vjeçarit, Eris Keta, që humbi jetën 20 ditë më parë në minierën e Bulqizës, sot shënohet viktima e radhës, ndërsa shteti vijon të heshtë përballë kësaj barbarie që po na vë një damkë turpi si shoqëri.
Eduart Dama vetëm 20 vjeç është viktima e radhës në minierat shqiptare, teksa sot e zu poshtë një masiv dheu në zonën D në xhunglën e Bulqizës.
Ngushëllimet me të sinqerta në emër të të gjithë minatorëvë shqiptarë i kam për familjen Dama që sot po përjeton një tragjedi të vërtetë, ndërsa urimi im është që fajtorët të ndëshkohen
Me datë 4 nëntor përmes medias për këtë çështje i kam bërë apel Inspektoriatit Shtetëror të Punës të shtojë kontrollet në minierat shqiptare, por ankesat e Konfederatës së Sindikatës ranë në vesh të shurdhër.
Fatkeqësisht tragjedia e paralajmëruar prej meje ndodhi, sot një familje fut nën dhe djalin e saj 20 vjeç, ndërsa me dhjetra familje të tjera luten që fëmijët e tyre të mos kenë fatin e Eduart Damës.
Shkaktari kryesor i vdekjes së Eduart Damës është inspektoriati Shtetëror i Punës, i cili në asnjë moment nuk është në lartësinë e duhur për të kryer misionin e tij.
Është e turpshme dhe çnjerëzore që po e lëmë vetën të na mundë barbaria makutëria dhe krimi që ka zaptuar Bulqizën.
Qeveria Rama duhet të marrë masa urgjente, teksa i bëj me dije se protestat e Konfederatës së Sindikatës do ta zgjojnë nga gjumi edhe Inspektoriatin edhe qeverinë.
Ftoj organet ligjzbatuese te nisin hetimet ndaj Inspektoriatit të Punës e mos ta lënë çështjen të shkojë në vetgjyqësi.
Ndërkohë jo më kot këto ditë i kamë bërë apel zonjës Kryemadhi të mos bëjë politike me statusin e minatorit, pasi politika e tyre ditore për një çështje kaq të rëndësishme ka pasoja fatale në jetë njerëzish.
Kryemadhi t’i udhëzojë bosët e saj në LSI e Tepsi që kanë miniera të përmirësojnë kushtet dhe të mos paguajnë nën dorë inspektorët e punës për të bërë një sy qorr e një vesh shurdh.
Partisë Demokratike i bëj thirrje të zgjohet pasi çështja e stastusit të minatorit është e një rëndësie të veçantë, ndaj t’i lenë pazaret dhe të bashkohen në këtë kauzë për ta finalizuar me miratim.
