“PS e ka braktisur programin e saj, s’ka më demokraci të brendshme”
Në Shqipëri nuk qeveris më e majta. Kjo deklaratë është bërë nga deputetja socialiste Mimoza Hafizi në emisionin “Ndiqe Programin” me gazetarin Enkel Demi. Në argumentimin e saj deputetja Hafizi tha se PS ka një program të majtë të shkruar, por që nuk është zbatuar asnjëherë. Sipas saj në këto vite të qeverisjes socialiste nuk u arrit të ngushtohet hendeku midis të varfërve e të pasurve, nuk u realizuan premtimet e bëra për arsimin, shëndetësinë, pagat e pensionet. Madje sipas saj edhe ligjet që kanë bërë socialistët nuk i kanë shërbyer publikut, dhe si shembull për këtë Hafizi sjell ligjin e arsimit të lartë i cili sipas saj favorizon privatët.
Ndërkohë për zhvillimet politike në PS, zonja Hafizi tha se sa kohë nuk ka zgjedhje në këtë parti nuk mund të flitet për demokraci të brendshme.
Pavarësisht se nuk i ka mohuar takimet e bisedat kohët e fundit me Edi Ramën, Hafizi ka bërë të qartë se do ti japë fund marrëdhënieve me PS. “Nuk do të jem më deputete e kësaj partie, nëse gjërat nuk ndryshojnë”. Me ndryshim zonja Hafizi, përcakton nëse Rama kërkon falje publike për referendumin dhe hap garë për zgjedhje në parti, gjë për të cilën ajo është e bindur se nuk ka asnjë shans që të ndodhë.
Pas përpjekjes për demokratizim të PS nga brenda, zonja Hafizi nuk mohon se së bashku me deputetin Ben Blushi po e shqyrtojnë edhe mundësinë e një force të re politike. Sipas saj për të ndryshuar dicka brenda forumeve të PS nuk më ka shpresë, ndaj edhe kanë nisur turin për të dëgjuar bazën. “Momenti është i favorshëm, tha Hafizi, një forcë të re politike përtej modeleve të sotme, rreth të cilës grumbullohen njerëz të ndershëm është e mirëpritur. Qytetarët janë të zhgënjyer nga politika aktuale. Nuk di të them do e bëjmë ne apo dikush tjetër një forcë të tillë politike, por është e qartë se tashmë ajo duhet”.
