Mesazhi i deputetes shkodrane: Armikun e kemi brenda vetes
Vargjet e poetit Katho Spiri: “Ku ta dija unë i varfri se armiku ishim ne”, kanë qenë thelbi i mesazhit që deputetja socialiste e Shkodrës, Mimoza Hafizi, ka përcjellë në Kongresin e PS. Duke folur në emër të socialistëve shkodranë Hafizi tha se dega e PS në Shkodër, është lënë në duar aventurierësh dhe e ka patur gjithmonë armikun brenda vetes. Për këtë nuk është e vështirë të kuptohej se shigjetat e akuzave të Hafizit ishin të drejtuara nga Rama, për faktin se ishte ai që afroi në atë parti “aventurierët e etur për pushtet politik dhe ekonomik”, siç thotë deputetja Hafizi.
Ja një pjesë nga fjala e saj në Kongresin e PS:
Dëshiroj që sot të flas me zërin e socialistëve shkodranë. Histotria 25 vjeçare e PS Shkodër ka vuajtur tallazet më të mëdha në jetën politike të viteve të demokracisë. E gjetur përballë një lufte nga të djathtët, me vota që historikisht janë blerë e janë blerë, e gjendur në kushtet e zhvendosjes së madhe të popullisë që kanë krijuar edhe rryma fërkimi brenda partisë, gjithësesi mendoj se armikun më të madh kjo parti, PS e Shkodrës, e ka patur brenda vetes.
Drejtimi nga qendra në Tiranë nuk ka arritur ta ndjejë kontekstin shkodran.
Vetëm në këtë 10-vjeçarin e fundit kjo parti, partia e Shkodrës ka patur një radhë kryetarësh të komanduar dhe më pas të shkarkuar njëri pas tjetrit. Komandimet janë bërë pa asnjë komnikim me bazën, pa asnjë komunikim me përfaqësuesit më të lartë. Për vite të tëra në 10-vjecarin e fundit partia e Shkodrës u la në dorë aventurierësh që sot janë në dyert e drejtësisë. Aventurierë pa asnjë lidhje me PS-në, por vetëm me inspirim për pushtet ekonomik e politik”.
