“Zgjidhja e konfliktit me socialistët do të jetë institucionale dhe jo me përdorim të retorikës konfliktuale politike”– tha Kreu i LSI-së, Ilir Meta pak orë pas akuzave të ashpra të eksponentëve të lartë të LSI ndaj qeverisjes dhe ministrave të PS
Në një takim me strukturat e njësisë 5 në Tiranë, Meta u shpreh se vizioni dhe përgjegjshmëria e partisë që ai drejton është zgjidhja institucionale e konflikteve. Meta tha që “…këto zgjidhje do ta çojnë angazhimin tonë për forcimin e shtetit ligjor dhe sundimit të ligjit në vend në nivele të reja, shumë më të larta dhe të qëndrueshme”.
Meta gjithashtu shprehu edhe qëndrimin pozitiv sa i takon Sekretarit të ri të Mbrojtjes së SHBA-ve, Mattis për Kosovën. Kreu i LSI e vlerësoi që “përkundër çdo lloj shqetësimi dhe paragjykimi më parë se stabiliteti dhe siguria e Kosovës është një prioritet shumë i rëndësishëm edhe për administratën e re të SHBA-ve dhe kjo është tepër pozitive duke patur në konsideratë tensionimin e marrëdhënieve Kosovë-Serbi kohët e fundit. Dhe njëkohësisht shumë e rëndësishme për stabilitetin e gjithë rajonit tonë në këto kohë ndryshimesh, por edhe pasigurish.”
