Kryetari i Kuvendit Ilir Meta ka zhvilluar një takim me deputetin e Partisë Demokratike Oerd Bylybashi, negociatori i opozitës për dialog me maxhorancën. Takimi u zhvillua në një nga hotelet në qendër të kryeqytetit.
Ndërkohë, më herët, Meta ka thirrur në një takim të gjithë drejtuesit e partive parlamentare për të diskutuar lidhur me zgjidhjen e krizës politike në të cilën ndodhet vendi.
Sakaq, kreu i PD-së Lulzim Basha ka thirrur në një takim në selinë e PD-së aleatët e tij. Ata janë duke diskutuar në një mbledhje pa kamera brenda selisë blu. Pas takimit me aleatët pritet që Basha të komunikojë edhe vendimin nëse do t’i përgjigjet pozitivisht ose jo ftesës së Metës.
