Kreu i Kuvendit Ilir Meta deklaroi se ligji i vettingut duhet të votohet patjetër sot, pasi Kuvendi është i vonuar në këtë proçes. Lidhur me kundërshtitë e opozitës, Meta tha se nuk i duket bindës qëndrimi i saj dhe se nuk sheh asnjë arsye se pse ajo nuk mund ta votojë.
Meta: Meqenëse ai bëri disa herë pyetjen pse ky ngut? Unë dua t’ju rikujtoj se jemi shumë vonë për ligjin për Vettingun në raport me procesin e reformës, por në mënyrë të veçantë në raport me plotësimin e detyrimeve tona në kuadër të procesit të integrimit evropian. Jo vetëm ky ligj, por edhe dy ligje të tjera normalisht duhet të raportoheshin më datë 1 shtator si të miratuar nga Kuvendi i Shqipërisë.
Prandaj, më vjen keq që gjithë kjo kohë që u dha në maksimum disa javë, nuk u shfrytëzua me efektivitetin e duhur. Askush nuk na siguron që kur nuk arritëm konsensus për këtë ligj për disa javë, të mund ta arrinim për disa orë. Do të ishte mrekulli ta miratonim mesnatën e 30 dhe 31 gushtit.
Për të gjithë ata të cilët përmendin konsensusin e 21 korrikut dhe apelojnë në vazhdimësi për konsensus, dua ta bëj të qartë se ka një dallim themelor midis konsensusit për Kushtetutën dhe konsensusit për ligjet dhe zbatimin e kushtetutës. Ky konsensus ka të bëjë me legjitimitetin e reformës, ka të bëjë me stabilitetin e vendit.
/ORA/
