Presidenti i Republikës, Ilir Meta i ka kthyer qeverisë dy ligje, të miratuara në seancën e 20 qershorit.
Perveç ligjit për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve, bëhet fjalë edhe për ligjin për vetëqeverisjen vendore.
Në relacionin e Presidentit, thuhet se ndryshimet ligjore cenojnë procesin vendimmarrës së Këshillave Bashkiake në lidhje me tjetërsimin e pronave të tyre.
“Këto ndryshime janë të pajustifikuara, pasi mënyra e re që propozohet për kuorumin e nevojshëm në vendimmarrjet e Këshillave Bashkiake nuk garanton mbrojtjen e interesit publik në procedurat e tjetërsimit të aseteve publike në pronësi të pushtetit vendor”, thuhet midis të tjerash.
“Siç rezulton qartësisht nga kjo ndërhyrje që propozohet të realizohet, në ligjin nr. 139/2015, ky ndryshim në ligj në thelb krijon një kompetencë të re për Këshillat Bashkiak, që është e drejta e këtyre të fundit për të hyrë në marrëdhënie juridike me persona të tretë për zhvillimin e pronës publike. Kjo kompetencë nuk ka qënë parashikuar më parë në ligj”, thuhet në relacion.
