Presidenti i Republikës Ilir Meta i ka kërkuar Kontrollit të Lartë të Shtetit që të nisë auditimin e plotë të shoqërisë “Albcontrol”.
Kreu i shtetit argumenton se i është drejtuar sot zyrtarisht KLSH-së i duke i kërkua që të nisë pa vonesë një auditim për “Albcontrol”, nisur nga situata tepër e rëndë e krijuar dhe veçanërisht rolit, që ka “Albcontrol” për administrimin dhe kontrollin e hapësirës ajrore të Republikës së Shqipërisë, e lidhur direkt me sigurinë kombëtare të vendit dhe me garantimin e shërbimeve për udhëtarët dhe qytetarët shqiptarë.
Auditimi kërkohet për mënyrën e menaxhimit të kësaj shoqërie, respektimin e dispozitave ligjore në vendimmarrjet e organeve drejtuese, përdorimin e fondeve publike, respektimin e procedurave në marrëdhëniet e punës, si dhe çdo aspekt tjetër që paraqet rrezik për veprimtarinë e sigurt dhe funksionimin normal të “Albcontrol”.
Presidenca thekson se kreu i shtetit po ndjek nga afër zhvillimet lidhur me menaxhimin e situatës në “Abcontrol” dhe në aeroportin “Nënë Tereza”, dhe se i kërkon autoriteteve respektive të marrin të gjitha masat, për të mos vënë në rrezik sigurinë e hapësirës ajrore në Republikën e Shqipërisë, për të rifilluar pa vonesë funksionimin e monitorimit ajror dhe të shërbimeve aeroportuale.
Meta u bën thirrje për reflektim të gjithë aktorëve të përfshirë dhe bën të ditur se është i gatshëm në çdo moment të thërrasë një tryezë për një zgjidhje sa më të shpejtë dhe të arsyeshme.
