“Demokracia dhe zgjedhjet e lira në Shipëri janë në rrezik, siç ishin në rrezik deri në 17 maj”
Kështu ka deklaruar Presidenti i zgjedhur Ilir Meta lidhur me situatën politike në vend duke paralelizuar efektet e marrëveshjes Rama-Basha të 17 majit me mosbesimin që lideri demokrat shfaqi gjatë ditëve të qëndrimit në çadër.
I ftuar në emisionin Opinion, Meta theksoi se Rama donte Reformën në drejtësi për të kapur drejtësinë në vend.
“Rama donte të bënte Reformën në Drejtësi për të kapur Drejtësinë, kam patur debate kokë më kokë, nuk kam pasur hallin e PD, por shqetësimin e stabilitetit të vendit, kam pasur shqetësimin e kësaj reforme.
Në rastin e dytë, Rama i donte zgjedhjet pa opozitën. Ai e ka futur Bashën për zgjedhje për ta përdorur. Është shumë e qartë kjo gjë. Të gjithë e kanë kuptuar këtë. Ata kanë bërë marrëveshje që të sabotojnë zgjedhjet për krizat e brendshme të partive. Ja, një njeri që do republikë të re dhe çon në mes të natës listën e PD-së pa pyetur kryesinë. Si mund të bëhet një veprim i tillë?”, është shprehur Meta.
Meta tha se Rama dhe Basha janë bërë bashkë kundër zgjedhjeve të lira e të ndershme duke krijuar një task forcë që po shkel të gjitha ligjet e shtetit.
Ish-kreu i LSI Ilir Meta tha se dy liderët Rama-Basha kanë frikë nga zgjedhjet, transparenca dhe nga përgjigja e popullit të cilën do e marrin më 25 qershor.
Meta, dyshen Rama-Berisha i cilësoi si “Tomy-Jerry” që po bëjnë presion, por sipas tij Basha është një flutur më tepër në zyrën e Ramës duke theksuar se vazhdimisht është keqpërdorur nga kryeministri.
“Nuk kam pasur frikë nga Berisha-Nano bashkë, nuk kam si të kem frikë nga Tomi dhe Jerry. Mua më interesojnë zgjedhjet e lira dhe që këta të dy të mos bëjnë presion. LSI-në nuk na e fali Enveri, Ramizi apo Saliu është partia e rinisë që e ngritëm me sakrificë. Basha pranoi të jetë një flutur më shumë në zyrën e Ramës. Pranoi të keqpërdorej për herë të tretë nga Rama. Herën e parë për çështjen Doshi Fufi. Të dytën për çështjen CEZ DIA. Basha ma ka pranuar që është keqpërdorur nga Rama”, tha Meta.
“Lidhur me arritjen e takimit Rama-Basha dua të falenderoj Vasilin dhe Shpëtim Idrizin që shkuan në tryezën para marrëveshjes. Por Basha e Rama po bëjnë lojë në cenim të standartit të zgjedhjeve. Ata janë bashkuar për shkak të rritjes që ka LSI dhe partitë e tjera. Përpjekjet për të bërë kurban LSI janë që në vitin 2008”, tha Meta.
Sa i përket fushatës së tij me LSI, presidenti i zgjedhur Ilir Meta sqaroi se ai e merr këtë post me 24 korrik, kur bëhet betimi.
“Së pari nuk kam kërkuar për president unë u detyrova të zgjidhesha për shkak të krizës artificiale, mua më ka çuar përgjegjësia ndaj vendit për të shpëtuar legjitimitetin e presidentit të vendit. Në qoftë se unë kam shkelur Kushtetutën ta mbledhim sot Parlamentin edhe le të më shkarkojnë. Së dyti sipas Kushtetutës unë jam President kur bëhet betimi më 24 korrik. Nuk vajta nga halli por vajta si detyrim ndaj të ardhmes së demokracisë së vendit. Unë jam presienti i ardhshëm, unë mund të isha edhe kryetari i LSI deri më 23 korrik por nuk e bëra se të ardhmen e LSI do e drejtojë Petrit Vasili”, u shpreh Meta.
