Presidenti Ilir Meta ka dhënë një intervistë për televizionin shtetëror të Malit të Zi ku ka folur kryesisht lidhur me sfidat e vendit drejt integrimit europian.
Meta ka theksuar se reformat nuk kishin cecur ashtu siç ishte planifikuar dhe se fondet e dhëna nga BE nuk kishin pasur efektivitetin e duhur. Më tej presidenti kërkoi që BE të ishte më kërkuese sa i përket arritjeve dhe rezultateve të reformave në vend.
“Institucionet europiane duhet të jenë më kërkuese për zbatimin efektiv të reformave, sepse disa prej tyre tashmë kanë ngritur shqetësimin se janë harxhuar shumë fonde, por efektiviteti ka qenë i ulët”, ka thënë ai.
Sipas tij, kjo ndodh sepse shpesh përfaqësuesit e institucioneve europiane në vendet tona konformohen me qeveritë në pushtet dhe nuk u qëndrojnë fort parimeve, mbi të cilat janë ideuar apo bazuar këto reforma. Ndërsa shton se “Shpesh shohim një kapje të shtetit nga pushteti, nga qeveria, si dhe një mosfunksionim të shtetit të së drejtës dhe një bilanc tepër negativ përsa i takon luftës kundër korrupsionit”.
