Nënkryetari i Partisë Demokratike, Luçiano Boçi ka ngritur shqetësimin sa i takon vendimit për të mbajtur në provë 3 muaj mësuesit.
Përmes një mesazhi të bërë në rrjetin e tij social Facebook, Boçi thekson se ky vendim është antiligjor, dhe se bie ndesh me kontratën midis Ministrisë dhe sindikatave.
“Vendimi për të mbajtur në provë tre mujore mësuesit “fitues” të portalit, është antiligjor dhe bie ndesh me kontratën midis Ministrisë dhe sindikatave.
Jo vetëm kaq!
Cili apo cilët janë ata që do përcaktojnë performancën tre mujore të mësuesit, sepse puna e tij matet me arritje në fund të një viti?!
Do jetë komisari politik, alias drejtori juaj i emëruar nga partia?
Apo shefi i zyrës X i DA edhe ky i emëruar nga partia?!
Apo patronazhisti, pasi të përcaktojë bindjen politike, apo anëtarësimin politik?!
Mjaft vuajtje i keni shkaktuar mësuesit!
Kjo është shumë e tepërt.
Mësuesi për t’u bërë i tillë, i nënshtrohen një kalvari torturues me vite akademike, licenca, kualifikime, provime e lloj-lloj marifetesh.
E gjithë kjo panoramë vuajtjesh, të krijon idenë sikur rroga e një mësuesi është 10.000 euro, ndërkohë që me zor arrin në 60.000 lekë.
Një njeriu i duhet kaq shumë stërmundim e investim, sa sot të bëhesh mësues ngjan mision i pavlerë, por dhe i pamundur.
Boll i morët zvarrë mësuesit dhe e keni bërë mësuesinë gogol e i keni zbrazur auditoret e fakulteteve të mësuesisë, duke i shkaktuar dëm të pallogaritshëm edukimit, shoqërisë e vendit.
Mësuesi nuk është kavie eksperimentale e as i sëmuri juaj klinik që ju sa herë ju teket, i shtoni terapitë e tuaja shfazuese e të përdala politike.
Nëse doni që mësuesit të rrisin performancën atëherë:
I rrisni pagën!
I ktheni dinjitetin!
I jepni mbështetje!
I lehtësoni punën!
Investoni në arsim!
I jepni autoritet!
I çlironi nga drejtuesit politikë!
I jepni status!
Vendimet e deritanishme tuajat bien erë politikë të qelbur dhe janë shantazh në prag të situatave zgjedhore!
Mësuesit duhet të reagojnë!”
