Studentët kanë paralajmëruar se do të fillojnë një protestë, pas vendimit se mësimi në universitete do të vijojë online.
Sipas tyre, mësimi online nuk është efektiv dhe për më tepër ata kanë bërë pagesat e shtëpive, ku do të qëndronin gjatë zhvillimit të mësimit në universitete.
“Për mendimin tim nuk është diçka normale, pasi mësimi online nuk ka qenë fare efektiv. Na kanë braktisur sepse thjesht na thonë që mësimi do të bëhet online. Por nuk thuhet asgjë se si do t’i sigurojmë paratë për internetin, pedagogët kanë pasur shumë problematika në qasjen e tyre”, thonë disa nga studentët.
Një tjetër student është shprehur se pjesa më e madhe e studentëve i kanë bërë pagesat nëpër konvikte dhe tani nuk kanë se ku të qëndrojnë.
“Kjo nuk është e drejtë sepse unë dua të filloj një punë dhe nuk kam ku të qëndroj. Është shumë e vështirë pasi jemi pak dit të fillimit të ri Akademik, shumë prej studentëve kanë paguar qiratë”, u shpreh një studente për “ABC News”.
Komiteti Teknik i Ekspertëve vendosi vetëm 3 ditë para se të fillonte universiteti, se mësimi do të zhvillohej online. Ky vendim ka çuar në acarimin e shumë studentëve, të cilët tashme ishin bërë gati për të hyrë në auditorët e universitetit.
Studentët kanë paralajmëruar se të hënën në orën 10:00 do të zhvillojnë një protestë para Ministrisë së Arsimit.
