Deputetja Mesila Doda ka reaguar ashpër ndaj ndryshimeve kushtetuese, të cilat i hapin udhën martesave homoseksuale. Ajo, pasi ka dhënë shpjegimet për ndryshimet në Paketën Kushtetuese, i ka kërkuar kolegëve të saj ligjvënës mos të votojnë ndryshime të këtilla. Sipas saj, nuk ka asnjë lidhje Reforma në Drejtësi me këto ndërhyrje në Kushtetutë, të cilat cënojnë në thelb Kodin e Familjes.
Më poshtë është reagimi i saj:
“Në heshtje, fare pa u ndjerë kaloi lajmi që Komisioni i posaçëm për Reformën aprovoi nenin që ndryshonte nenin 18 të Kushtetutës, pika 2, i cili ndryshohet si vijon:
Askush nuk mund të diskriminohet padrejtësisht për shkaqe të tilla si gjinia, raca, feja, etnia, gjuha, bindjet politike, fetare a filozofike, identiteti gjinor, orientimi seksual, gjendja ekonomike, pasurore, arsimore, origjina sociale, lindja, aftësia e kufizuar, përkatësia shoqërore, prindërore ose të tjera.
Në paragrafin e mësipërm janë shtuar togfjalëshat: orientimi seksual dhe identiteti gjinor.
Futja e këtyre togfjalëshave çel rrugën për goditjen dhe rrëzimin e menjëhershëm të nenit 7 të Kodit të Familjes, i cili parashikon se: Martesa mund të lidhet ndërmjet një burri dhe një gruaje. Ky nen nuk ka asnjë lidhje e asnjë arsye të futet si mish i huaj bashkë me Paketën Kushtetuese për Drejtësinë.
Të përmirsojmë sistemin e drejtësisë, PO! Të godasim strukturën tonë shoqërore, JO!
Unë i bëj thirrje çdo kolegu ligjvënës të kundërshtojë aprovimin e një neni të tillë që godet thelbin e sistemit tonë shoqëror. Asnjë reformë apo ndryshim, në emër të së cilës fshihet një deviacion i tillë i familjes nuk mund të gjejë përkrahjen e deputetëve dhe cilitdo burri, gruaje, vajze a djali që kërkojnë një jetë në respekt të ligjeve natyrore e atyre hyjnore. Unë nuk e votoj një nen të tillë. Le të bashkohemi të gjithë për t’i thënë jo këtij atentati kundër familjes.”
