26 vite më parë, “studentja e ndrojtur” rrëfen emocionet e ditëve të rëndësishme të historisë së Shqipërisë, kohën e rrëzimit të diktaturës komuniste.
Si sot 26 vite më parë, më 20 shkurt 1991, studentët fituan betejën më të ashpër me komunistët. Greva e tyre e urisë u finalizua me shembjen e diktatorit Enver Hoxha në sheshin kryesor të Tiranës. Mesila Doda asokohe ishte vetëm 20 vjeç, ishte pjesë e asaj greve bashkë me shumë vajza e djem të tjerë, të cilët vendosën atë shkurt të vitit 1991, të rrëzojnë diktatorin, pa marrë parasysh se çfarë kërkonte e synonte udhëheqja e PD-së, partisë që lindi falë protestave të tyre. Përmes një filmimi, ku shfaqet duke folur plot emocione, Mesila rrëfen për ato ditë të rëndësishme, kohës kur bashkë me vajza e djem të tjerë studentë të dhjetorit, u bënë protagonistë të njërit prej momenteve më të rëndësishme të historisë së Shqipërisë.
“Kjo video është marrë në fund të grevës së urisë ‘91. Studentja 20 vjeçare në video është shumë larg me të sotmen, por një gjë është e sigurt… 20 vjeçare dhe më shumë se e ndrojtur pati fatin të ishte pjesë e brezit kurajoz që sfidonte sistemin dhe Enver Hoxhën.
Tash pas shumë vitesh sfidat janë të ndryshme, kurajo mbetet, ndërsa frika është vrarë para çerek shekulli…
Sfidat e sotme janë ndaj diktaturave të reja, ndaj korrupsionit dhe arrogancës, sfidë ndaj sistemit politik autokratik e diktatorial që është krijuar dhe që po i merr frymën Shqipërisë dhe shqiptarëve”, shkruan Mesila Doda.
