Sepse, në qoftë se për katër vite rrjesht flasim për kontrata korruptive koncesionare, nuk mund t’i harrojmë dot, meqë jemi në bashkëqeverisje.
Kështu u shpreh deputetja e Partisë Drejtësi, Integrim dhe Unitet, e shoqëruar nga kandidatë për deputetë të kësaj partie, gjatë një takimi pasditen e sotme me banorët e Tiranës pranë Pazarit të Ri.
Për bashkëqeverisjen Doda shtoi se kërkon të paktën të shohë një rezultat konkret të punës së tyre.
Gjithashtu gjatë takimit Doda i bëri thirrje politikës të rregullojnë gjuhën dhe të përcjellin më shumë pozitivitet dhe kulturë.
Mesila Doda:
Më pëlqen që politika shqiptare të krijojë dhe gjëra të mira dhe të mos ketë vetëm debate, tensione, dhe atë baltën që jemi mësuar ta shohim gjithmonë që ja hedhin njëri-tjetrit.
Në fakt, në Kosovë dhe rajon nuk është kaq e egër sa në Shqipëri.
Do doja nga politikanët shqiptarë të rregullojnë gjuhën, duhet të flasin më mirë, sepse ajo që i transmetojnë njerëzve nuk është as pozitivitet, as kulturë dhe as nuk i mësojmë fëmijët me një gjuhë më të mirë.
Mos harrojmë të rregullojmë gjuhën e komunikimit me njërin tjetrin, por mos harrojmë dhe kauzat.
Sepse, në qoftë se për katër vite rrjesht flasim për kontrata korruptive koncesionare, nuk mund t’i harrojmë dot se jemi në bashkëqeverisje.
Nëse flasim që ka probleme me rendin dhe sigurinë, nuk mund t’i harrojmë dot se jemi në bashkëqeverisje.
Në qoftë se jeni në bashkëqeverisje, të paktën të shohim një rezultat konkret të punës tuaj.
Mendoj që politikanët kanë nevojë për një përkushtim më të madh. Dhe të mos harrojmë një gjë: Pushteti nuk mund të jetë një qëllim në vetëvete. Partitë politike duhet të sjellin vlera të shtuara dhe rezultate konkrete në punën e tyre, me qëllim që njerzit t’i votojnë.
Dhe ajo që ka ndodhur sot në Shqipëri është shembulli më i mirë i asaj që kanë bërë për 27 vite.
Ndërsa kandidati për deputet i PDIU-së Arjan Hamiti tha se të gjithë shqiptarët në Malin e Zi, në Maqedoni, në Luginën e Preshevës, do të jenë bashkë në një zë për Çështjen Kombëtare, kur bëhet fjalë për Çështjen Çame.
“Ky vokacion i fuqishëm, i cili ndjehet sot në Kuvendin e Shqipërisë, falë vokacionit brilant të deputetëve të PDIU-së dhe liderit të saj politik Shpëtim Idrizi do të ndjehet fuqishëm në Parlamentin Shqiptar”- u shpreh Hamiti.
