“Dënimi si armiq të brendshëm a të jashtëm të kujtdo që nuk është dakord me status quo-në e krijuar, është formë komuniste komunikimi dhe agresioni.”
Deputetja e PDIU-së Mesila Doda, reagoi ndaj sulmeve që media të opozitës kanë lëshuar gjatë ditës së djeshme ndaj eurodeputetit Knut Fleckenstein. Përmes një mesazhi në facebook, Doda shpreh keqardhjen për sulmet ndaj njeriut që ka hartuar raportin më pozitiv, i cili e çoi Shqipërinë vetëm një hap larg çeljes së negociatave me BE-në. Doda e sheh si një mënyrë komunikimi komuniste, agresionin e opozitës ndaj kujtdo që nuk është dakord me status quo-në e tyre.
“Është e paimagjinueshme ajo që ndodh në vendin tonë. Topat e baltës u shpërhapën pa asnjë teklif edhe mbi eurodeputetin Fleckenstein. Kujtoj që është njeriu që me raportin e tij bëri të mundur që Shqipëria të jetë një hap larg hapjes së negociatave me BE. Pjesën tjetër e kanë detyrim politikanët shqiptarë që t’i japin jetë një reforme jetike për vendin dhe jo të vërsulin lloj lloj marrie për të bërë pis një mik të nderuar të këtij vendi.
Vërej me frikë se klasa poltike po ndahet përditë e më shumë nga populli i vet. Njerëzit shpresojnë që do ndryshojë diçka në këtë vend. Klasa politike ka detyrimin të punojë për përmirësimin e standarteve institucionale në vend. Dënimi si armiq të brendshëm a të jashtëm të kujtdo që nuk është dakort me status quo-në e krijuar, është formë komuniste komunikimi dhe agresioni“, shkruan Doda.
