“Faleminderit popullit shqiptar për pritjen jashtëzakonisht zemërgjerë në vendin tuaj të bukur”
Me një mesazh për popullin shqiptar e ka mbyllur vizitën e tij 4-orëshë në Tiranë, Sekretari Amerikan i Shtetit, John Kerry. Ai ka zhvilluar takimin e tij të fundit në këtë vizitë, me përfaqësues të shoqërisë civile ku dhe ka lënë mesazhin në librin e përshtypjeve të vendosur në Qendrën për Hapje dhe Dialog. “Faleminderit popullit shqiptar për pritjen jashtëzakonisht zemërgjerë në vendin tuaj të bukur. Shtetet e Bashkuara janë shumë krenare për miqësinë tonë. Shqipëria është një aleate e shkëlqyer e NATO-s. Një partner në luftën kundër ekstremizmit dhe një mike e shkëlqyer. Përshëndetjet më të përzemërta.John Kerry”, shkruan zyrtari i lartë amerikan. Ai ka lënë Tiranën rreth orës 14.00 për t’u nisur drejt Shteteve të Bashkuara të Amerikës.
