Gjermania ka vendosur që të mos votojë hapjen e negociatave me Shqipërinë, derisa kriza politike në vend të mos jetë zgjidhur.
Sipas FinanzNachrichten konfirmimi është bërë i ditur nga Angela Merkel një ditë më parë për qeverinë e saj, në një takim të Komitetit për Europën në Bundestag. Por situata brenda koalicionit qeverisës CDU/CSU-SPD në lidhje me Shqipërinë është e përshkallëzuar.
Me këtë kancelarja del qartazi kundër partnerit në koalicion, Partisë Socialdemokrate, SPD, që përkrah votimin pro për hapjen e negociatave në Këshillin e BE më 18 qershor.
Ministri gjerman i Shtetit për Europën në Ministrinë e Jashtme, Michael Roth (SPD) është një nga politikanët gjermanë që është angazhuar fort javët e fundit për hapjen e negociatave me dy vendet e Ballkanit. Ai ka theksuar në intervista të ndryshme, se angazhimi i Shqipërisë për reforma duhet të vlerësohet.
Por CDU/CSU kundërshtojnë dëshirën e Komisionit Europian për të vendosur mbi hapjen e negociatave të pranimit me të dy vendet në 18 qershor.
