Presidenti i Serbisë Aleksandër Vuçiç ka shprehur mbështetjen dhe i ka bërë thirrje Maqedonisë së Veriut që të mos e refuzojë propozimin francez.
“Mos refuzoni paraprakisht, para se të mendoni mirë për interesat kombëtare”, ka theksuar presidenti serb Aleksandar Vuçiç, në një intervistë për televizionin Sitel.
Vuçiç nënvizoi se propozimi evropian nuk duhet refuzuar para se të mendohet mirë dhe si shembull mori Marrëveshjen e Brukselit në 2013 për të cilën tha se nuk e kishte të lehtë ta firmoste.
“Unë normalisht nuk mund t’ju them nëse propozimi është i mirë apo jo, le të vendosë populli i Maqedonisë. Mund të them vetëm një gjë, kur pranuam Marrëveshjen e Brukselit në vitin 2013, ishte një marrëveshje shumë e vështirë për ne me shumë pika që njerëzit në Serbi nuk donin t’i dëgjonin apo pranonin. Qytetarët maqedonas, do të them përsëri, ata e dinë më mirë se unë nëse diçka është e mirë apo jo për interesat kombëtare të vendit të tyre. Unë thjesht po kërkoj nga njerëzit të mendojnë, të mendojnë për të mos pranuar apo refuzuar diçka apriori”.
Propozimi i ardhur nga presidenti francez Emmanuel Macron pritet t’i japë zgjidhje konflikteve historike mes Bullgarisë dhe Maqedonisë së Veriut. Opozita maqedonase është shprehur skeptike për këtë propozim duke thirrje dhe protesta kundër qeverisë. Në vitin 2020, Bullgaria vendosi VETO-n duke bllokuar fillimin e bisedimeve të pranimit në BE për Maqedoninë e Veriut mbi mosmarrëveshjet historike midis dy vendeve. Kushtet e Bullgarisë për heqjen e saj ishin respektimi i qëndrimit kornizë, përfshirja e bullgarëve në Kushtetutën e RMV-së, në mënyrë që të mbrohen të drejtat e tyre dhe së treti, të zbatohej marrëveshja e fqinjësisë. Ndërkohë një javë më parë parlamenti bullgar vendosi të heqë veton duke i hapur rrugën edhe Shqipërisë në rrugën e anëtarësimit drejt BE-së.
