Një ngjarje kriminale ka ndodhur mesditën e sotme në Vlorë, në lagjen 10 korriku, në afërsi të Ujit të Ftohtë në Vlorë. Policia po heton për zbardhjen e kësaj ngjarje enigmatike, me plumba por pa autorë.
Fillimisht një person ka njoftuar në sallën operative për të shtëna me armë. Policia ka mbërritur në vendin e ngjarjes dhe ka rrethuar zonën me shiritin e sigurisë. Në njoftimin paraprak për mediat thuhet se “rreth orës 11:40, ka ardhur një telefonatë se një person dyshohet të ketë qëlluar me armë zjarri në ajër, në lagjen “10 Korriku”. Janë ngritur grupe të posaçme për kontrollin e territorit dhe po punohet për kapjen e autorit. Nuk ka asnjë person të dëmtuar”.
Siç shihet në video, brenda zonës së rrethuar “skenë krimi” është një automjet luksoz Porsche Cayenne me xhama të zinj. Sakaq, burimet i thanë gazetarit se në vendin e ngjarjes janë gjetur 3 gëzhoja pistolete. Në automjet dyshohet se ka qenë një person i cili ka bërtitur “më vranë!”
Burime nga policia thanë se personi që denoncoi është shoqëruar dhe po merret në pyetje në komisariat.
