Elton Qyno
Këshilli i Lartë i Prokurorisë, ka miratuar sot kandidaturën e prokurorit të Sarandës, Kledian Llaho, si drejtues të kësaj prokurorie me mandat, 3 vjeçar.
Vendimi për emërimin e Llahos, është marrë me unanimitet të plotë nga anëtarët e KLP-së, duke i dhënë mundësinë prokurorit Llaho, të drejtojë akuzën e qytetit bregdetar.
Llaho, ka disa vite që shërben në detyrën e prokurorit, ku pjesën më të madhe të karrierës së tij, e ka pasur në prokurorinë e Vlorës.
Fillimisht karriera e tij, ka nisur si oficer në Durrës dhe më pas tek Prokuroria e Krimeve të Rënda. Duke çuar më tej në vendimmarrjen e ish-presidentit Bamir Topi, që vendosi ta dekretonte prokuror në Vlorë.
Gjatë punës në Vlorë, Llaho ka drejtuar një sërë dosjesh penale që lidhen me vrasjet në këtë qytet dhe abuzimet me pronat në zonën e Karaburunit dhe Zvërnecit.
Më pas në 27 janar 2022, Llaho u komandua nga KLP si drejtues në prokurorinë e Sarandës. Komandimi i tij erdhi sapo ish-drejtuesi Alfred Shehu, u emërua nga KLP si prokuror pranë prokurorisë së Posaçme SPAK.
Ndërkohë po ditën e sotme, anëtarët e Këshillit të Lartë të Prokurorisë, vendosën të emërojnë në Prokurorinë e Apelit Tiranë 10 prokurorë që shërbenin në 4 prokuroritë e Apeleve në rrethe.
Mes 10 emërimeve, janë komanduar dhe tre prokurorë të tjerë që duhet të transferohen në Tiranë, me qëllim përballimin e volumit të madh të dosjes që prej 1 shkurtit do gjykohen në një Apel të vetëm kombëtar.
