Mbledhja për ndryshimet Kushtetuese, Rushaj: Flasim për 3 propozimet tona; PS: S’ka kohë për të pritur

Ka nisur me mosdakordësi mes palëve, mbledhja  e Këshillit të Legjislacionit, ku do të diskutohet propozimi i PS për zgjatjen e afateve të institucioneve të vettingut. Kreu i grupit parlamentar të PD-së, Alfred Rushaj tha se kjo mbledhje duhet të shtyhet.

Sipas tij, mbledhja duhet të shtyhet pasi kjo çështje duhet të diskutohet së bashku me propozimin e demokratëve për ndryshimeve kushtetuese. Rushaj propozoi se mbledhja duhej të mbahej më 3 nëntor.

Nga ana tjetër, deputetja e PS-së Klotilda Bushka tha se mazhoranca propozon që nismat të propozohen veç e veç dhe jo të gjitha së bashku pasi zgjatja e afateve të vettingut nuk pret pasi KPK ka mandat deri në qershorin e ardhshëm.

Alfred Rushaj: Propozojmë shtyrjen e mbledhjes. Të bëhet mbledhja e përbashkët në datë 3 nëntor ku të diskutohen edhe nismat e dy palëve.

Klotilda Bushka: Nisma përfshin një grup të caktuar interesi, ku do të kërkohet dhënia e mendimit të tyre. Kjo nismë do të përcaktojë vlerësimin e domosdoshme të shtyrjes së afateve të institucioneve të vettingut. Nisma e PD në fakt ka të ëbëjë me shumë çështje brenda saj që do të kërkojnë më shumë kohë. Vetëm para disa ditësh në lidhje me reformën zgjedhore, kolegët e PD kanë paraqitur një kërkesë për ngritjen enjë komisioni të posaçëm për Reformën Zgjedhore. Kërkohet kohë dhe konsultim më i gjatë. Ne propozuam që nismat të shqyrtohen veç e veç dhe jo sëbashku.