Mbesa e Osama bin Laden u shpreh se një sulm tjetër i stilit të 11 shtatorit mund të jetë i pashmangshëm, nëse Joe Biden fiton zgjedhjet presidenciale të këtij nëntori në SHBA.
Noor bin Laden në një prononcim për të përditshmen amerikane, New York Post, tha që ajo beson se ISIS lulëzoi nën administratën Obama / Biden dhe kjo bën që ajo të votojë që Trump të mbetet në zyrën Ovale.
“ISIS u përhap nën administratën Obama / Biden, duke bërë kalimin e tyre më pas në Evropë. Trump ka treguar se ai mbron Amerikën”,- tha ajo.
Duke e përshkruar veten si “me zemër Amerikane”, 33-vjeçarja, e cila jeton në Zvicër, tha se ajo kishte qenë një mbështetëse e Trump që kur ai njoftoi se po kandidonte në 2015-ën, duke shtuar “Unë e admiroj këtë njeri të vendosur”.
“Ai duhet të rizgjidhet … kjo është jetike për të ardhmen, jo vetëm të Amerikës, por edhe të civilizimit perëndimor si një i tërë”,- tha ajo.
“Ju po i shikoni të gjitha sulmet terroriste që kanë ndodhur në Evropë gjatë 19 viteve të fundit. Ata na kanë tronditur plotësisht deri në themel. Islami Radikal është infiltruar plotësisht në shoqërinë tonë”,- u shpreh 33-vjeçarja.
Ajo është vajza e gjysmë vëllait më të madh të Osama bin Laden, Yeslam Bin Laden dhe autores zviceriane Carmen Dufour, i cili u nda nga jeta në vitin 1988.
