Finalja e së mërkurës e Conference League që do të zhvillohet në Tiranë, ku dy skuadra të mëdha, Roma dhe Feyenoord do të përballen në Air Albania, pritet që “ti vërë flakën” Tiranës.
Mijëra italianë dhe holandezë, tifozë “të thekur” të dy skuadrave do të mbështesin futbollistët brenda dhe jashtë stadiumit, duke u shndërruar në një sfidë të paprecedent për policinë.
Në pamjet që ka siguruar Gijotina.com shihet se kanë mbërritur edhe tifozët e parë të Feyenoord. Ata janë shfaqur në lokalet, në një nga zonat më të populluara të Tiranës. Më birra në dorë, ata këndojnë dhe festojnë.
Mësohet se nga Italia dhe nga Holanda kanë udhëtuar edhe dy grupe policësh, të specializuar në menaxhimin e tubimeve të ngjashme në Romë dhe Roterdam. Rreth 20 policë italianë dhe 10 holandezë kanë pasur takime sot në Drejtorinë e Policisë së Tiranës për të dhënë ekspertizën e tyre në menaxhimin e tifozerive, për të cilat ka edhe materialet për elementët problematikë.
Për të evituar përplasjet, është parashikuar që tifo-grupet të qëndrojnë sa më larg njëri-tjetrit, që në hyrje të Tiranës. Një ndër problemet që mund të hasen do të jetë konsumi i drogave të lehta nga ana e tifozevë holandezë. Duke qenë se kanabisi është i legalizuar në Holandë, nuk është çudi që dy ditët e ardhshme në rrugët e Tiranës të hasen tifozë që tymosin qetësisht kanabis.
Për të qenë të sigurt për çdo skenar, edhe spitalet ku do të dërgohen tifozët në rast përplasjesh janë të paracaktuar. Burimi nga policia tha për Gazeta Shqiptare se ambulancat do të dërgojnë tifozë italianë tek spitali i traumës dhe tifozë holandezë në QSUT. Gjithsej 3 mijë forca policore do të jenë në terren të mërkurën, kur pritet të jetë edhe kulmi i lëvizjes së dy tifozerive.
