Kryeministri Edi Rama ishte sot në Elbasan, ku ka zhvilluar një takim me disa nxënës të shkollave të mesme në këtë qytet.
Këta të fundit shprehën sugjerimet dhe problematikat me të cilat hasen. Mes të tjerash, një nxënëse i tha kryeministrit se afër shkollës së saj po ndërtohet një pallat tjetër dhe sugjeroi se duhet të ketë më shumë hapësira të gjelbra.
“Pa dashur të përsërisja dua të ngre problematikën e infrastrukturës, siç janë ngrohja, shkallët e emergjencës, i kemi të ngushta shkallë në rast tërmeti dhe zjarri nuk do ndiheshim të sigurt.
Duhet tu jepet më shumë rëndësi aktiviteteve kulturore dhe artistike. Këtu ne Elbasan ka qenë një kinema, mësuesit na kanë treguar se pas shkollës mblidheshin bashkë, kjo nuk ndodh më në këto vite. Për të shkuar në kinema na duhet të shkojmë te TEG-u në Tiranë ose te Rozafa.
Këtu do të ndërtohet edhe pallat tjetër afër shkollës tonë dhe do të sugjeroja që terrenet e shkollave duhet të rrethohen nga më shumë hapësira të gjelbra dhe jo kaq shumë pallate”,- u shpreh ajo.
