“Gelina” ishte emri i personazhit që do të luante në filmin “Muri i gjallë”, aktorja Matilda Makoçi. Në një prej ditëve të xhirimeve, ajo u zhduk. Ja si e rrëfen regjizori i filmit Muharrem Fejzo, takimin e fundit me aktoren Matilda Makoçi.
“Do të nisem për në Greqi. Kam një hall të madh…të më kuptoni… – dhe duke i tërhequr zvarrë fjalët e fundit, me lot në sy, u zhduk e përcjellë nga Edi, i cili në ecje e sipër vazhdonte të na hidhte disa vështrime të ftohta. Kushedi ç’fjalë gatuheshin në shpirtin e saj. Që nga ajo kohë më humbi nga sytë sot e kësaj dite. Punë e tyre.”
Prej asaj kohe, Matilda Makoçi nuk u shfaq më në skenat shqiptare për t’u rikthyer këto ditë tetori pas 26 vitesh në një ekspozitë ku recitoi disa poezi.
Matilda Makoçi ishte një aktore shumë e dashur për publikun shqiptar të vitive ‘80.
Ishte një aktore simpatike që u largua prej vitit 1990 nga Shqipëria duke lënë pas ato role të ndjera që ka luajtur në disa prej filmave më të rëndësishëm shqiptarë. Prej 26 vitesh askush nuk e dinte me saktësi se çfarë bënte dhe cila ishte jeta e saj.
Në media janë shkruar shumë versione mbi atë çfarë ajo ka përjetuar prej ndarjen me ish-bashkëshortin e saj, sot kryeministër i Shqipërisë, Edi Rama. Por ajo kurrë nuk është shfaqur në media të thotë versionin e saj.
Ka pak ditë që Matilda është rishfaqur në skenat e artit në Shqipëri. Është pritur me shumë zhurmë në media. Kjo zhurmë nuk lidhet shumë me kohën, kur ajo ishte artiste apo me kohën, kur mungoi, por është e lidhur pikërisht me atë çfarë ajo mendon për Edi Ramën, ish-bashkëshortin e saj, sot kryetar i qeverisë.
Ajo që bie në sy është fakti se mediat pranë kryeministrit e kanë promovuar të parat kthimin e Matildës në skenë dhe pikërisht këtu nis edhe debati. Askujt nuk i ka bërë përshtypje intepretimi në recitimin e disa poezive në një ekspozitë pikture, e quajtur “Harem”, por vëmendja e mediave pranë kreut të qeverisë është përqendruar pikërisht tek ajo çfarë duhet të thoshte Matilda për kryeministrin, ish-bashkëshort i saj, babai i djalit të tyre, Greg.
“Edi Rama ka qenë shoku im i rinisë, me të cilin ndamë ëndrrat tona dhe kemi një djalë të mrekullueshëm, Gregun. Tani shoku im i rinisë ndjek rrugën e ëndrrave të tij dhe nuk më mbetet gjë tjetër veçse t’i uroj suksese në misionin e tij”, tha Matilda.
Prej këtu nisin të shfaqen copëzat e çmendinës tonë. Një shpërthim histerik me gjithfarë lloj hamendësimesh për bashkëjetesën e saj me kryeministrin Rama, kohë kur ata lindën djalin e tyre Gregorin, i cili ka të gjithë të drejtën që të mos cënohet as nga media, as nga politika, e as nga babai i tij.
Duket sikur edhe vetë kryeministri e ka preferuar një debat të tillë. Nëse Rama nuk do ta donte një rikthim të Matildës në skenë, bashkë me zhurmën që e pasoi, pa asnjë dyshim nuk do të ndodhte, sepse kaq gjë e ka në dorë. Aq më tepër, kur ish-bashkëshortja e tij, megjithë hijet e historisë së tyre të përbashkët në të shkuarën, shfaqet pikërisht në mediat më afër tij. Ndërkohë që TVSH ka disa ditë që transmeton filma, ku luan Matilda Makoçi. Ta jetë rastësi vallë…?
Të jetë rastësi që mediat pranë Ramës t’i qepen hap pas hapi një ekspozite pa ndonjë peshë specifike në botën shqiptare të artit, e cila ka sjellë në disa recitime Matildën?! E pasi i ka recituar do vargje, ajo pastaj i përgjigjet po këtyre mediave të kryeminiisrtit edhe për çfarë i ndodhi në rininë e saj, kur bashkëudhëtar me ëndërrat kishte edhe Edi Ramën…?
Nga njëra anë janë mediat kundër Ramës që e stigmatizojnë atë dhe nga ana tjetër mediat pranë tij që promovojnë të shkuarën e tij, të cilën me ç’duket po kërkon ta kthejë në një tjetër formë, pasi në atë që ka ekzistuar nuk e bën shumë krenar. Janë dy anë të një vendi që ngjan me çmendinën e ku enden si personazhe kalimtare, të gjitha “Matildat” që na shfaqen si filozofia, përmes të cilës drejtohet shoqëria jonë.
Me historinë e saj të brishtë, Matilda na shfaqet sot për të risjellë me “nostalgji”, një copëz të vogël të jetës që “pikturoi” shoku i ëndërrave të rinisë së saj, Edi Rama. Ne të tjerëve na mbetet të presim e të shohim sa e ngjashme do të jetë “piktura” e Shqipërisë pasi Rama ta ketë lënë drejtimin e saj.
