Kryetari i PD-së, Lulzim Basha e ka konsideruar si akt diskriminimi ndaj shqiptarëve vendimin e Presidentit të Maqedonisë Ivanov për të mos pranuar mandatimin e Zaevit për shkak të pranimit të platformës shqiptare.
Basha tha se bashkëpunimi dhe respekti i ndërsjelltë etnik është e vetmja rrugë që do ti garantojë Maqedonisë stabilitetin, prosperitetin dhe rrugën e sigurtë drejt integrimit euroatlantike.
Reagimi i Bashës
Me shqetësim të thellë përcolla qëndrimin e presidentit të Maqedonisë për të refuzuar mandatimin e qeverisë së re për shkak të pranimit nga ana e subjektit politik në fjalë të dygjuhësisë.
E konsideroj këtë qëndrim një akt diskriminimi etnik që nuk i kontribon harmonisë midis etnive shtetformuese në Maqedoni.
Maqedonia stabile, demokratike dhe e integruar në NATO dhe BE është interesi më i mirë i shqiptarëve në Maqedoni, dhe vullneti i të gjithë shqiptarëve në këtë drejtim është i palëkundur.
Por stabiliteti dhe rruga e integrimit të Maqedonisë cënohet rëndë nga akte të tilla diskriminuese. Pranimi i dygjuhësisë e emancipon Maqedoninë nga ngerçet dhe paragjykimet dhe zgjeron hapësirën e lirisë duke forcuar kështu vetë themelet e saj.
Rikonfirmoj mbështetjen për Platformen Shqiptare dhe ju kërkoj partive politike shqiptare në Maqedoni të veprojne të bashkuara në mbështetje të të drejtave legjitime të shqiptarëve në Maqedoni.
Bashkëpunimi dhe respekti i ndërsjelltë etnik është e vetmja rrugë që do ti garantojë Maqedonisë stabilitetin, prosperitetin dhe rrugën e sigurtë drejt integrimit euroatlantike.
