Pas vendimit të Gjykatës Kushtetuese, që shfuqizoi ashpërsimin e masave për armëmbajtje pa leje, ministri i drejtësisë Ylli Manjani, prezantoi në komisionin e sigurisë ndryshmet në Kodin Penal.
Manjani tha se Ministria e Drejtësisë ka ngritur një grup pune për hartimin e kodit të ri penal, pasi sipas tij ndërhyrjet e shpeshta i kanë humbur atij konsistencën dhe kanë krijuar vakuume në implementimin e tij.
Manjani: Është më mirë të kthehemi tek logjika e proporcionalitetit dhe të bëhet dënimi efektiv, se sa të vendosim dënime që nuk aplikohen dhe na sjellin këtë pasojë. Ose shtohet “pazari” i korrupsionit aty ku merret vendimi, se zakonisht kur rritet sanksioni kjo është pasoja.
Ndërhyrjet e shpeshta në kodin e penal, u kritikuan dhe nga anëtari i komisionit parlamentarë i Lëvize Socialiste për Integrim Luan Rama.
Manjani: Nismat për ndërhyrjen në Kodin Penal e kanë sjellë ministra të tjerë pa kaluar siç e përcakton Kushtetuta dhe ligjet, siç citova, nëpërmjet Ministrisë së Drejtësisë. Ç’është më e rënda, edhe ne këtu në komision, por në mënyrë të veçantë Komisioni i Ligjeve që është komision bazë, por edhe Kuvendi e ka pranuar duke legjitimuar këtë praktikë antikushtetuese.
Ndryshimet e propozuara nga Ministria e Drejtësisë zbusin ndjeshëm dënimet për armëmbajtje pa leje nga masat që u ndërmorën 2 vite më parë por që u cilësuan antikushtetuese nga gjykata.
Në kod propozohet që mbajtja e municioneve luftarake, pa leje përbën kundërvajtje penale dhe dënohet me gjobë ose me burgim deri në dy vjet.
Për armëmbajtje pa leje në banesë, parashikohet dënim deri në tre vjet burgim, ndërsa për mbajtjen e armëve shpërthyese ose lëndëve plasëse, parashikohet burgim nga një deri në katër vjet, ndërsa për mbajtjen e tyre në automjet ose mjedise publike, dënohesh me burgim nga tre deri në shtatë vjet.
Për prodhimin, shitjen apo blerjen e armëve dhe municioneve luftarake, kodi parashikon burgim nga pesë deri në dhjetë vjet.
Kryetari i Komisionit të Sigurisë Spartak Braho dhe deputeti i PDIU-së Aqif Rakipi i kërkuan ministrit të Drejtësisë, që t’i kërkojë presidentit shpalljen e një amnistie për të gjithë ata qytetarë, të cilët janë dënuar me Kodin e vjetër Penal, për armëmbajtje pa leje. Kodin penal, ish-fuqizuar nga gjykata kushtetuese, parashikonte për armëmbajtje pa leje një dënim deri në 15 vite burg.
