Ministri i Drejtësisë paralajmëroi strukturë për hetimin e gjyqtarëve pas ankesave të shumta që vijnë nga qytetarët
Ministri i Drejtësisë, Ylli Manjani paralajmëroi ngritjen e një komisioni për inspektimine punës së gjyqtarëve. Komisioni i inspektimit po përgatitet nga Ministria e Drejtësisë në bashkëpunim me KLD. Manjani tha se vlerësimi i figurës së gjyqtarëve do të bëhet përmes një komisioni të posaçëm. “Po përgatisim një inspektim të përgjithshëm dhe do të doja ta bëja bashkë me Inspektoriatin e KLD për të mos krijuar asnjë paralelizëm, por për ta bërë sa më profesionale.
Kemi precedent të cilët do të duhet të vendosen në shtratin ligjor të sjelljes. Kemi rënë dakord që procedura e vetingut të figurës së gjyqtarëve do të bëhet me një komision të posaçëm. Kjo ka qenë dhe mbetet një angazhim i fortë i shtetit shqiptar. Kështu që kjo nuk është më mbrojtje politike, por është vendosje para përgjegjësisë së ligjit dhe marrje përgjegjshmërisë”, tha ministri i Drejtësisë.
