Ministri i drejtësisë Ylli Manjani deklaroi se koalicioni PS-LSI funksionon, por ka shumë helm jashtë marrëdhënies së tyre që vënë në dyshim koalicionin duke menduar se do të bjerë nga dita në ditë.
Ndërsa marrëdhënien me Partinë Demokratike Manjani e vlerëson në këtë mënyrë: “Nëse disa qëndrime koncidojnë me qëndrimet e PD, unë nuk mendoj që kjo është blasfemi. PD përbëhet prej shqiptarësh dhe jo prej serbësh. Pra, e duan Shqipërinë.”
I pyetur në një intervistë në Ora News për ndryshimet në Kodin Penal, të cilat zbutën dënimet për armëmbajtje pa leje, pas vendimit të Gjykatës Kushtetuese Manjani shprehet i bindur se masat ekstreme të dënimit, nuk ndihmojnë në uljen e kriminalitetit.
Qeveria shqiptare ka hapur procesin për përzgjedhjen e gjyqtarëve në Gjykatën Europiane të të Drejtave të Njeriut, por minisitri Manjani, vlerëson se ky proces duhet të ndërpritet, në mënyrë që dhe këta aplikantë t’i nështrohen kontrollit të figurës, në kuadër të reformës në drejtësi.
Manjani tha se miratimi i reformës në drejtësi ka krijuar një situatë paniku mes gjyqtarëve e prokurorëve, ndaj edhe u bëri thirrje që në këtë fazë tranzitore të tregohen korrektë.
