Balla inspekton punimet për rehabilitimin e kanalit vaditës në Librazhd: Mbulon me vaditje 1264 ha tokë bujqësore
Nga Maela Marini
TIRANË, 30 maj/ATSH/ Kryetari i grupit parlamentar të Partisë Socialiste, Taulant Balla, i shoqërur nga kryetari i bashkisë së Librazhdit, Kastriot Gurra inspektoi sot punimet që po kryhen për rehabilitimin dhe sistemimin e kanalit vaditës të Mesit në Njësinë Administrative Qendër në Librazhd.
Në fjalën e tij, Balla tha se pas investimit në sistemin e ujit të pijshëm, në Bashkinë e Librazhdit me rëndësi është po ashtu dhe sistemi i vaditjes.
“Aktualisht jemi duke investuar në sistemimin e kanalit të mesit, rreth 10 km i gjatë, që mbulon me vaditje 1264 ha tokë bujqësore në fshatrat, Dorëz, Gizavesh, Librazhd Qendër etj. Investimi parashikon asfaltimin e 4.7 km kanal vaditës dhe ndërhyrjen me tuba çeliku aty ku ka rrezik shembje”, tha Balla.
Ai shtoi se prej kohësh fermerët e kishin pritur një investim të tillë dhe Bashkia e Librazhdit synon të vijojë edhe në zona të tjera me investime që lehtësojnë punën e fermerëve.
Më tej, gjatë fjalës së tij, Balla kerkoi që punimet e kanalit të përfundojnë përpara sezonit të vaditjes.
“Pas mesit të qershorit ne hyjmë në sezonin e vaditjes dhe të gjitha këto zona kanë nevojë që kulturat e tyre bujqësore të kenë në dispozicion ujin për vaditje”, tha Balla.
/m.m/j.p/
Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.
