Nën drejtimin e Van Gal, skuadra ka shënuar vetëm 49 gola, shifra më e ulët në histori, për sezonin e ardhshëm vihet bast për 80
Ka fituar vetëm një FA Cup dhe të gjitha shifrat e Mançester Junaitid sezonin e shkuar ishin katastrofikë. Skuadra e Van Gal e ka përfunduar edicionin me 49 gola të shënuar, shifra më e ulët e “djajve të kuq” gjatë të gjithë historisë së tyre në Premier League. Tashmë pritet që gjithçka të ndryshojë me ekipin e Hoze Murinjos, aq më shumë që pas mbëritjes së Zlatan Ibrahimoviç, për ta mbyllur me 80 gola të shënuar, kompanitë e bashteve e kuotojnë me koeficientin 6.00. Në fakt, skuadrat e Special One nuk e kanë arritur kurrë këtë kuotë, kështu në tre tituj kampionë të fituar me Çelsin, blutë e Londrës nuk kanë shënuar asnjëherë më shumë se 73 gola. Sipas bookmakers, Ibra kuotohet me koeficientin 1.80 që do të jetë golshënuesi më i mirë i Junaitid, madje me diferencë të ndjeshme nga ndjekësit, Martial 6.00, Runi 8.00 dhe i riu Rashford në kuotën 10.00. Megjithatë, në parashikimin për të fituar titullin e ardhshëm, gjë që Murinjo ia ka premtuar tifozëve se do ta arrijë qysh në sezonin e parë në krye të pankinës, të kuqtë vazhdojnë të mbeten pas “kushërinjve” të Sitit.
