Rrëfimi i Xhisiela Malokut në emisionin “Open” rrëzon dëshminë e oficerit të policisë Emiljano Nuhu dhe ekspertizën ligjore, sipas të cilëve ajo është dhunuar dhe djegur me cigare nga djali i deputetit socialist Rrahman Rrahja.
Vajza, historia e së cilës ka tronditur politikën ka rrëfyer se ka bërë dëshmi të rreme në polici, e shtyrë nga xhelozia për Rexhep Rrahjan, teksa tha se ish i dashuri i saj e ka qëlluar vetëm njëherë me shpullë.
Por rrëfimi krejt ndryshe nga dëshmia e saj në polici, duket se nuk e bind gazetaren e kronikës në Top Channel, Anila Hoxha që të besojë se ndaj vajzës nuk është ushtruar dhunë dhe presion.
“Ajo vjen nga zona e Niklës për të cilën vetë Policia e Shtetit u mburr kur hyri pak javë më parë. Vjen nga një zonë e njohur për aktivitet kriminal dhe ka përballë njerëz përballë të cilëve është shumë e pafuqishme”, tha Hoxha në studion e Open, duke lënë të kuptohet se vajza ka mbrojtur Rrahjën pasi ka presion ndaj saj.
Hoxha argumentoi se kur shoqëronte moderatoren Eni Vasili gjatë intervistës pa se Xhisiela Maloku erdhi me një makinë, ku shoqërohej nga njerëz “të fortë”.
“Eni, ne ishim bashkë kur ajo erdhi për intervistën dhe ne e pyetëm se me çfarë erdhi, dhe na tha me taksi, por ne e pamë që ajo erdhi me një makinë tjetër dhe e shoqëruar. E pamë edhe kur iku. Nuk e di se kush mund të kanë qenë ata, por ajo na gënjeu. Fakti që tha se erdha me taksi, tregon që ajo fshihte diçka. Nuk përputhen shumë gjëra me ato ç’ka thoshte Xhisiela. Nuk mund të gënjejë një ekspert policie dhe më habit fakti që ekspertiza mbërriti kaq vonë në polici. Xhisielës i flet gjuha e trupit, mënyra sesi lëviz qepallat”, theksoi Hoxha./Ship
