Pas aksidentit të regjistruar pasditen e së mërkurës në lagjen “5 maji” në Elbasan, ku një mjet përplasi një fëmijë 4 vjeç teksa po kalonte rrugën, komuniteti i asaj lagjeje u ngrit sot në protestë. Të prekur nga ngjarja e rëndë dhe të shqetësuar për jetën e fëmijëve të tyre banorët kërkuan ndërhyrje në infrastrukturë dhe sinjalistikën rrugore.
Sipas banorëve, vendosjen e policëve të shtrirë në rrugë e kanë kërkuar disa herë, por asnjë masë nuk është nga pushteti vendor, për të cilën thonë se kujtohet për ta vetëm në kohë fushate.
“Ku i di ky fëmijë vija të bardha. Makinat kalojnë me 120 km/h, përplasi lart një fëmijë 4 vjeçar, më iku truri. Fëmija është shumë keq, ka lëndime në kafkë”, tha një e afërme e të miturit.
Një i mitur dëshmitar në momentin e përplasjes së fëmijës 4 vjeç u shpreh se ndjehen të rrezikuar sa herë kalojnë rrugën.
“S’kanë vënë bordure, e kemi shumë problem. Të qan shpirti me këto raste, është e dyta herë që ndodh kjo në këtë rrugicë. Kemi bërë ankesë e gjithë lagjja. Këtu po na vriten fëmijët”, u shpreh një banor i lagjes.
4-vjeçari i aksidentuar një ditë më parë është transportuar për kurim të specializuar në kryeqytet, ndërsa pas aksidentit banorët e pranishëm qëlluan me gurë mjetin që drejtohej nga 26-vjeçari që shkaktoi aksidentin.
