Një prind nga Prishtina ka rrëfyer se si ditën e sotme vajza e tij 6-vjeçare është goditur nga një makinë midis sheshit “Nëna Tereza”, ku është e ndaluar lëvizja e automjeteve.
Ai përmes një postimi të bërë në rrjetin social Facebook ka shkruar se një shofer me makinë të tipit “BMË” pasi e goditi vajzën e tij, iku nga vendi i ngjarjes dhe siç thotë ai ende nuk është arrestuar nga policia.
“Sot në mëngjes, një të diele të qetë vikendi dola për të pirë kafen e mëngjesit në sheshin e Prishtinës me bashkëshorten dhe 2 fëmijët e mi (vajza Aria gjashtë vjeçe dhe djali Arktiku shtatë vjeç).
Fëmijët me vete kishin edhe biçikletat e tyre, një qytetar i kohës se paleolitit rreth orës 09:40 hyn me një veture BMË sheshit të Prishtinës nga Hotel Swiss Diamond dhe del tek rruga e kafiterisë Zanzi Bar meqë rast e godet vajzën time në sheshin “Nënë Tereza” dhe me një shpejtësi te madhe ik nga vendi i ngjarjes. Te gjithë ne mbetëm të shokuar nga kjo ngjarje bizare. Çfarë njeriu duhet të jesh të hysh në shesh, të godasësh një fëmijë 6 vjeç dhe aq më pak te ikësh nga vendi i ngjarjes.”
Gjithashtu, ai thotë se vajza ka pësuar gërvishtje dhe ndrydhje, ndërsa emocionalisht është e shqetësuar.
“Ekipet e Emergjencës dhe Policise dolën në vendin e ngjarjes. Vajza ka pësuar gërvishtje dhe ndrydhje, ndërsa emocionalisht është e shqetësuar. Falenderoj qytetaret e pranishëm për solidaritetin dhe ndihmën e ofruar, gjithashtu falenderim i veçantë edhe për ekipin e emergjencës. Ora tani është 17:44 ndërsa dhunuesi, egërsia, paleoliti as që është interesuar të bëjë një telefonatë dhe të pyes për gjendjen e vajzës dhe gjendet ende në arrati!”
