Organizimi i një forumi të përvitshëm mes Shqipërisë dhe Greqisë, ku do të përfshihen përfaqësues të brezit të dytë, biznese, politikanë, akademike etj, ishte në fokus të bashkëbisedimit të ministrit të Shtetit për Diasporën, Pandeli Majko me gazetarët dhe korrespodentët në Greqi.
Në këtë takim, mbajtur në kuadër të vizitës zyrtare të ministrit Majko në Athinë, u diskutua edhe për integrimin dhe rëndësinë e aktiviteteve për diasporën që jeton në Greqi.
Gjithashtu, ministri pati edhe një takim me mësuesit e gjuhës shqipe në Athinë. Majko i njohu ata me hapat dhe iniciativat që po ndërmerren për krijimin e lehtësirave për mësuesit e diasporës shqiptare ndërsa u vu theksi te planet konkrete që do të mundësojnë një qasje më të lehtë ndaj librave shkollorë.
Ndërsa gjatë bisedimeve të zhvilluara me një grup studentësh shqiptarë, ministri Majko i informoi ata mbi një projekt në fazë të avancuar, i cili do tu mundësojë të njohin më mirë Shqipërinë. Ministri i Shteti për Diasporën i ftoi të rinjtë të vijnë në atdhe, për të diskutuar mbi plane konkrete, sipas fushës së tyre të interesit.
Në takimin më përfaqësuesit e shoqatave shqiptare u diskutua mbi projekte që do të synojnë mbrojtjen e të drejtave të emigrantëve. Ministri u kërkoi atyre të jenë më aktivë e më të organizuar në shërbim të komunitetit shqiptar atje.
Majko i informoi ata me nismat që po ndërmerr ministria, të tilla si panaire, duke propozuar bashkëpunim në këtë aspekt.
Nga ana e tyre përfaqësuesit e shoqatave e njohën Ministrin me problemet kryesore me të cilat përballet komuniteti shqiptar në Greqi.
https://www.ata.gov.al/foto-majko-ne-greqi-lehtesira-per-mesuesit-e-diaspores-shqiptare/
