“Qeveria politizoi ushtrinë dhe uli buxhetin e mbrojtjes”
Kryetari i Partisë Demokratike, Lulzim Basha ka përcjellë një mesazh me rastin e 67 vjetorit të themelimit të NATO dhe 7 vjetorit të Anëtarësimit të Shqipërisë në këtë organizatë. Pas urimeve për shqiptarët dhe për SHBA e aleatët strategjikë, Basha shprehet se është krenar që në 8 vitet e qeverisë së PD-së u udhëhoq një proces historik reformash, sipas tij në fushën e sigurisë dhe të mbrojtjes. Por nga ana tjetër, Basha akuzoi qeverinë se ka ulur me 50 për qind buxhetin për mbrojtjen, në kundërshtim me ato që kërkon NATO, duke punësuar militantë në radhët e ushtrisë. “Shpreh shqetësimin por edhe angazhimin tim se do te bëjmë gjithçka të mundur për të ndalur prishjen e balancave kushtetuese; arrogancën e paprecedentë politike; mungesën e konsensusit; shpërdorimin propagandistik të burimeve, pronave dhe kapaciteteve të mbrojtje; uljen drastike të buxhetit me 50%, politizimin ekstrem të FA, dhe rrëshqitjen e Shqipërisë në fundin e listës së vendeve të NATOs – ku fatkeqësisht e kanë katandisur pseudo reformat e dështuara në këtë fushë. Eshtë për të ardhur keq që standardet e NATOs janë përdhosur në këto tre vite veçanërisht në fushën e mbrojtjes, ku jo vetëm kemi rënie të buxhetit nga 2 për qind që është kërkesë e Aleancës në 0.87 % të GDP, por ku paratë e shqiptarëve shpërdorohen në mënyrë skandaloze për luks zyrash, apo vidhen me tendera të korruptuar, siç ka zbuluar Kontrolli i Lartë i Shtetit”, shprehet Basha në mesazhin e tij.
