Zv/sekretari i Përgjithshëm i LSI-së, Luan Rama ka reaguar në lidhje me grabitjen e 7 milionë eurove në aeroportin e Rinasit.
Nëpërmjet një statusi në Facebook, Rama kujton grabitjen e dy viteve më parë në aeroport, e cila ishte gjithashtu në prag të zgjedhjeve.
Zv/sekretari ironizon heshtjen e kryeministrit në lidhje me ngjarjen, duke i përmendur atij reagimin për djegien e kërpudhës gjatë protestës masive opozitare.
Postimi i plotë:
Grabitje dhe të vrarë
në aeroportin e Rinasit!
Sistemi i sigurisë në aeroportin e vetëm ndërkombëtarë nuk funksionon!
Përsëri grabitje; grabitje dhe të vrarë në aeroportin e Rinasit!
Për të disatën herë, grabitësit të armatosur, hyjnë në pistën e aeroportit, shëtisin nëpër pistë si ua do qefi, e shkojnë deri tek avioni ku gjendeshin paratë, i rrëmbejnë e prej andej, i bëjnë të fala Kryeministrit dhe qeverisë së tij, duke e përshëndesin për masat e marra dhe sistemin “funksional” të sigurisë!
Për koinçidencë, edhe kjo vjedhje ndodh në prag të zgjedhjeve, njësoj si grabitjet e mëparshme!
Nuk mbetet tjetër gjë, vetëm pritet që kryeministri të dalë e të akuzojë opozitën për baltën dhe ziftin që po prodhon, për të bërë pis imazhin e qeverisë!
Ai që çfarë nuk tha kur iu dogj kërpudha e kryeministrisë, për vrasjen dhe grabitjen e 10 milionë eurove prej avionit në mes të pistës së aeroportit të Rinasit, nuk ka thënë ende asnjë fjalë!
Kryeministër kërpudhor!
