Vasili: Është një krim i shëmtuar që meriton dënimin më të rreptë. Drejtësia duhet të veprojë me shpejtësi
Kryetari i grupit parlamentar të Lëvizjes Socialiste për Integrim, Petrit Vasili, dënoi vrasjen e elektriçistit në Shkodër, ngjarje e ndodhur dy ditë më parë. Në një deklaratë për mediat, Vasili i shpreh ngushëllime familjes së Zamir Velajt, punonjësi i OSHEE që humbi jetën në krye të detyrës. “Dua t’i shpreh ngushëllime familjes së Zamir Velajt, elektricistit që humbi jetën në krye të detyrës. Ky është një krim i shëmtuar që meriton dënimin më të rreptë. Drejtësia duhet të veprojë me shpejtësi. Shprehim mbështetjen e plotë për çdo punonjës të shtetit që kryen me përkushtim detyrën dhe respekton e zbaton ligjin. Të merren nga shteti masa të gjithanshme për mbrojtjen e punonjësve gjatë ushtrimit të detyrës shtetërore”.
Ngjarja e rëndë u dënua edhe nga kryeministri Edi Rama një ditë më parë, duke e cilësuar masakër mbi shërbëtorin e shtetit.
44 vjecari Zamir Velaj punonjës i OSHEE-së në Shkodër u vra nga abonenti debitor, teksa vinte një sahat në Oblikë në Anë të Malit.
Pas ngurimit të elektriçistit për të mos i rilidhur energjinë elektrike, që i ishte prerë prej 28 qershorit për shkak të debisë prej 2.3 milionë lekë të vjetra të pashlyer, 54 vjeçari Martin Zefi, është rikthyer në banesë, ka marrë thikën dhe ka goditur 3 në gjoks dhe në qafë 44 vjeçarin Velaj, i cili ka ndërruar jetë rrugës për në spitalin rajonal të Shkodrës.
Zefi është arrestuar menjëherë nga policia, dhe gjatë marrjes në pyetje në komisariat ka pranuar autorësinë e krimit.
